Newsbook

Free - On Google Play

View
Impjiegi minn jobsinmalta.com  

Assassinju DCG: Mhux il-Gvern se jiddeċiedi min jieħu l-€1 miljun

Matthew Borg  -  21/10/17 04:24 PM

Mhux se jkun il-Gvern li jiddeċiedi min jingħata €1 miljun għall-informazzjoni li jgħaddi lill-awtoritajiet li tgħin lill-Pulizija fl-investigazzjonijiet tagħha tal-qtil ta’ Daphne Caruana Galizia.

Il-punt ta’ riferiment se jkun ir-rapport tal-Inkjesta Maġisterjali, u l-flus jitħallsu skont ma’ jgħid dar-rapport.

Aktar kmieni dil-ġimgħa, iben Daphne Caruana Galizia, Matthew, f'isem ħutu, talab għar-riżenja tal-Prim Ministru, Joseph Muscat, filwaqt li rrimarka li mhux flus iridu l-familja Caruana Galizia, iżda li jinbidlu l-affarijiet.

Huwa ddeskriva s-sitwazzjoni f'Malta bħala waħda ddisprata, bla kontabbiltà politika, bla integrità fil-ħajja pubblika u fejn m’għandekx soċjetà miftuħa u ħielsa, affarijiet li ġġieldet għalihom ommu.

Il-Gvern qal dan fi stqarrija, meta sostna li huwa impenjat biex dan il-każ jiġi riżolt u min kien responsabbli jiġi identifikat u mressaq quddiem il-Qrati.

Filwaqt li ddeskriva dal-każ bħala wieħed li jeħtieġ miżuri straordinarji, il-Gvern kompla jgħid li min jgħaddi din l-informazzjoni jingħata protezzjoni biex jixhed dak kollu li jaf quddiem il-Maġistrat Inkwerenti.

Anki jekk xi ħadd jgħaddiha lill-Pulizija b’mod kunfidenzjali, xorta waħda jkun eliġibbli għall-flus.

Il-Gvern ifakkar li hemm ukoll id-dispożizzjonijiet tal-Whistleblower’s Act u emendi oħra li jistgħu jintużaw minn min seta’ kien involut u jrid jikkollabora mal-Pulizija biex jinqabad il-qattiel.

Min ikun irid jersaq biex jagħti l-informazzjoni jista’ jċempel fuq in-numru 22942008 jew jibgħat fuq crimeinfo.police@gov.mt