Newsbook

Free - On Google Play

View
Impjiegi minn jobsinmalta.com  

Assassinju DCG: Il-PM jgħid għaliex mhux se jattendi d-dimostrazzjoni

Yendrick  Cioffi  -  22/10/17 10:56 AM

Il-Prim Ministru Joseph Muscat qal li ntbagħat messaġġ ċar li lilu ma jriduhx jattendi għad-dimostrazzjoni li se tkun qed issir illum wara l-assassinju tal-ġurnalista Daphne Caruana Galizia.

“Jien naf fejn hu posti u fejn le,” qal il-Prim Ministru u għalhekk saħaq li mhux se jattendi għal din id-dimostrazzjoni.

Waqt intervista fuq One Radio,  Dr Muscat qal li minkejja dan jaqbel li kien hemm bżonn manifestazzjoni nazzjonali dwar dan u kien għalhekk li talab lill-Partit Laburista biex jieħu sehem u jgħaddi messaġġ ta’ għaqda  nazzjonali.

"Ir-reputazzjoni ta' Malta saritilha ħafna ħsara"

Il-Prim Ministru qal ukoll li huwa fatt li wara dan l-assassinju, ir-reputazzjoni tal-pajjiż saritilha ħafna ħsara.

Il-Prim Ministru tkellem dwar il-bżonn li fuq il-midja internazzjonali joħroġ il-fatt li l-pajjiż mhux se jaċċetta dan il-qtil brutali bħala fatt normali, iżda li l-pajjiż qed jagħmel minn kollox, fosthom juża miżuri staordinarji biex issir ġustizzja.

"Mal-midja internazzjonali ngħidu l-affarijiet kif inhuma"

Qal ukoll li hemm mezzi tax-xandir internazzjonali li jista’ jkollhom interess mod ieħor f’Malta u insista li hemm bżonn li min jitkellem mal-midja internazzjonali jgħid l-affarijiet kif inhuma u mhux jgħid dak li jrid jisma’ hu, biex imbagħad jgħid: “Anke l-midja internazzjonali qed tgħid hekk!”

"Nixtieq li DCG għadha ħajja biex meta tkun lesta l-inkjesta dwar Egrant tara l-verità"

Il-Mexxej Laburista tkellem ukoll dwar l-allegazzjonijiet li għamlet Daphne Caruana Galizia li l-kumpanija Egrant hija ta’ martu Michelle Muscat u qal li jixtieq li l-ġurnalista assassinata għadha ħajja biex meta tkun lesta l-inkjesta tara l-verità.

"Adrian Delia għandu x'jaħbi"

Iżda fakkar ukoll fl-allegazzjonijet li għamlet fuq il-Kap tal-Oppożizzjoni Adrian Delia li fi kliemu jvarjaw minn ħasil ta’ flus għal skandli ta’ prostituzzjoni internazzjonali.

Qal li żamm lura milli jikkummenta għax kien qed jistenna l-Qorti tiddeċiedi, iżda fakkar li Delia issa rtira l-libelli kollha.

“Dak li kien magħruf indifen magħha,” qal Muscat. “Issa Adrian Delia għandu jagħmel bħali u jitlob inkjesta maġisterjali... jien naħseb li Delia għandu x’jaħbi.”

"Importanti li ngħatu spazju lill-investigaturi"

Mistoqsi jekk hemmx informazzjoni ġdida, Dr Muscat qal li l-importanti bħalissa huwa li l-investigaturi jingħataw l-ispazju.

Faħħar ħafna l-kummenti tal-President tal-Kummissjoni Ewropea Antonio Tajani, fosthom li jkun hemm investigazzjoni internazzjonali dwar dan l-assassinju, għax fi kliemu jista’ jkun hemm barranin involuti.

"Simon Busuttul hu bniedem żgħir"

Ikkritika ħafna l-kummenti ta’ Simon Busuttil fil-Parlament u qal li dan juri kemm “Simon Busuttil hu bniedem żgħir.”

Temm jisħaq li l-poplu għandu bżonn il-ħin tiegħu biex jishar f’dan il-mument u l-politiku jkun insensittiv jekk jibqa’ għaddej normali. Saħaq li l-pajjiż għandu futur sabiħ quddiemu.