Newsbook

Free - On Google Play

View
Impjiegi minn jobsinmalta.com  
AĦNA MHUX SE NISKTU   |  Il-President tilqa' lis-Soċjetà Ċivili; Jitolbu r-riżenja mmedjata tal-Kummissarju u l-AĠ   |  "Mhux eskluż li l-assassinju kien ikkummissjonat minn politiċi" - Oħt DCG   |  Ritratti: Quddiem id-Depot isejħu għar-riżenja tal-Kummissarju tal-Pulizija

Awdjo: "Dak li ħażin għall-qalb, ħażin għall-moħħ" - Prof. Scerri

Matthew Borg  -  21/09/17 04:01 PM

Il-Professur Charles Scerri qal li n-nuqqas t’eżerċizzju fiżiku u mentali jistgħu jħaffu sabiex wieħed toħroġlu l-kundizzjoni tal-Alzheimer’s aktar ’il quddiem.

Proprju fil-Jum Dinji tal-Alzheimer’s, Newsbook.com.mt tkellem ma’ Scerri, mid-Dipartiment tal-Istudji tad-Dimensja fl-Università ta’ Malta, li hu wkoll kofundatur tas-Soċjetà Maltija tad-Dimensja, u dan enfasizza r-relazzjoni sfiqa li hemm il-moħħ u l-qalb.

Irrimarka li minbarra l-eżerċizzju fiżiku, wieħed ma jridx iħalli l-moħħ jitgħażżen, billi fost l-oħrajn jaqra, joħroġ u jitkellem man-nies dwar dak li qara, jiddiskuti u jikkritika.

Il-professur, li studja fil-fond il-kawżi tal-Alzheimer’s, qal li dawk l-affarijiet li jagħmlu ħsara lill-qalb jagħmlu ħsara lill-moħħ ukoll.

Barra minn hekk, Scerri semma wkoll iż-żmien u d-daqqiet repeturi fuq ir-ras, kawżi oħrajn tal-Akżheimer’s.

F’Malta, hawn madwar 2% tal-persuni għandhom dil-kundizzjoni, li hi biss waħda minn aktar minn 100 kundizzjoni oħra li jaqgħu taħt is-sintomi tad-dimensja. L-Alzheimer’s hija l-aktar komuni, b’aktar minn 60% tal-każi tad-dimensja.

Scerri sostna li l-Alzheimer’s mhux bilfors relatata mal-anzjanità jew iż-żmien. Fil-fatt qal li sintomi tal-Alzheimer’s jistgħu jitilgħu fil-wiċċ mal-20 sena wara li jkunu skattaw fil-moħħ u l-ġisem.

Din hija waħda mill-isfidi ta’ nies bħal Scerri li jittrattaw id-dimensja, li meta xi ħadd jersaq fuqhom, ikollu sintomi li ilhom jagħmlulu l-ħsara f’moħħu snin sħaħ.

Finalment, Profs. Scerri rrimarka li meta nitkellmu dwar l-Alzheimer’s, jew id-dimensja, irridu niftakru fil-persuni li jieħdu ħsieb persuni li jbatu mill-kundizzjoni. Dawn huma nies li jbatu wkoll minħabba l-ħin u l-attenzjoni meħtieġa għall-kura ta’ persuni bid-dimensja.

Id-dimensja tiswa fi flus lill-pajjiżi ħafna aktar minn kemm tiswa l-kura tal-kanċer, aċċenna l-professur.

Wieħed jista' jċempel fuq 1771, servizz telefoniku miftuħ 24 siegħa kuljum, sabiex jikseb informazzjoni u jikkonsulta mat-tobba.