Newsbook

Free - On Google Play

View
Impjiegi minn jobsinmalta.com  

Iridu li Fearne jiftaħ inkjesta dwar is-settur tas-saħħa u l-VGH

Matthew Borg  -  17/01/18 05:48 PM

Il-grupp Awturi ta’ Malta Ġdida talbu lill-Ministru għas-Saħħa, Chris Fearne, biex jiftaħ inkjesta dwar il-privatizzazzjoni tas-settur tas-saħħa f'Malta u Għawdex, wara li aktar kmieni llum l-Awditur Ġenerali laqa’ talba biex jiġi investigat in-negozju tal-isptarijiet mal-Vital Global Healthcare.

It-talba kienet saret mill-Partit Nazzjonalista, meta permezz tal-membri tagħha fuq il-Kumitat Parlamentari tal-Kontijiet Pubbliċi, ressqet talba formali lill-Awditur Ġenerali sabiex jinvestiga dan it-trasferiment u jġib ċarezza dwar kif saru l-affarijiet.

Min-naħa tagħhom Awturi ta’ Malta Ġdida qalu li jirrikonoxxu l-fatt li mhux Fearne kien li ffirma l-kuntratt, imma enfasizzaw li jifhmu wkoll li huwa Fearne, fl-irwol uffiċjali tiegħu, li għandu l-aktar saħħa politika li jirranġa l-ħsara qabel ma ssir permanenti.

Appellaw lill-Ministru biex jieħu passi legali kontra l-VGH abbażi tal-kuntratt miksur bejn il-Ministeru u l-kumpanija, iwaqqaf il-ftehim bejn VGH u Steward Healtcare u jsejjaħ inkjesta indipendenti fil-ftehim oriġinali mal-VGH kif ġie iffirmat mill-Ministru Konrad Mizzi.

“It-talba tal-PN ġiet tard” – PL

Il-Partit Laburista rreaġixxa wkoll għad-deċiżjoni tal-Awditur Ġenerali, meta qal li l-Gvern m’għandux x’jaħbi dwar dan in-negozju.

Spjega li l-Ministru Fearne kien diġà għamel talba simili għal dik tal-PN fl-2016 biex l-Awditur Ġenerali jibda investigazzjoni fuq il-bejgħ lill-VGH.

Għalhekk temm jgħid li t-talba tal-PN fil-verità ġiet tard.

“Għandna raġun nitħassbu” – PN

Il-Partit Nazzjonalista kompla jgħid li l-fatt li l-Awditur Ġenerali laqa’ t-talba tagħhom hu ġustifikazzjoni biżżejjed biex jinkwetaw fuq dan l-innegozjar.

Staqsa jekk il-ftehim tal-Gvern mal-Vitals kienx jirrapreżenta valur għal flus in-nies.

“Mażżra m’għonq il-qasam tas-saħħa f’Malta” – PD

Il-Partit Demokratiku wkoll qal tiegħu, meta rrimarka li fid-dawl ta’ aktar informazzjoni li ħarġet dwar il-ftehim tal-Gvern mal-Vitals, jirriżulta li skonthom intrabtet mażżra m’għonq is-servizz tas-saħħa f’Malta.

Irrimarkaw li wara li ħareġ fil-midja li l-kontenut tat-tliet sptarijiet inbiegħ lil Vitals għal ewro biss, issa biex il-poplu jerġa’ jieħu tnejn mit-tliet sptarijiet irid iħallas lill-VGH €80 miljun.

Il-PD temm jgħid li dan kollu qed jindika li s-settur tas-saħħa f’Malta ħa daqqa ta’ ħarta tajba b’dan id-deal, u se jbatu l-ġenerazzjonijiet li jmiss minħabba f’hekk.

Jitlob biex bħalma kien għal mijiet ta’ snin, is-servizz tas-saħħa jkun tal-Maltin u jmexxuh huma.