Newsbook

Free - On Google Play

View
Impjiegi minn jobsinmalta.com  

Jitwaħħlu strixxuni jistaqsu min qed jaħbi l-laptop ta' Daphne

Matthew Borg  -  17/04/18 09:40 AM

Dal-lejl twaħħlu strixxuni oħra f’postijiet madwar Malta jistaqsu min għandu l-interess jaħbi l-laptop tal-ġurnalista maqtula, Daphne Caruana Galizia.

Din l-azzjoni jidher li hi reazzjoni għal dak li ntqal il-ġimgħa l-oħra fil-Qorti b'rabta mal-laptop tal-ġurnalista li l-Pulizija għandha.

L-espert li evalwa l-laptop qal li dan ilu ma jintuża mill-2015.

F’rapport li deher fil-ġurnal Malta Today, intqal li l-Maġistrat Anthony Vella, li qed jieħu ħsieb il-każ dwar il-qtil tal-ġurnalista, filwaqt li kkonferma li l-Pulizija talbitu jieħu l-pussess tal-laptop u l-informazzjoni li kien hemm fih, ma setax iwieġeb jekk staqsiex lill-familja Caruana Galizia biex jagħtuhulu.

F’seduti minn qabel il-Qorti, l-Ispettur Kurt Zahra kkonferma li l-Pulizija ma sabet ebda traċċa ta’ laptops jew tablets fix-xena tad-delitt.

Madankollu filmat imtella’ mill-ġurnal Lovin Malta juri li strixxun minn dawn li twaħħal faċċata tal-istejġ qrib Bieb il-Bombi tneħħa minn persuna.

Ilbieraħ il-Membru Parlamentari Laburista, Glenn Bedingfield, xerred artiklu ta’ Newsbook.com.mt dwar il-messaġġ tal-Arċisqof waqt il-quddiesa għal ruħ Daphne Caruana Galizia, u qal li min hu bil-għatx għall-ġustizzja, ma jaħbix evidenza.

Ritratti: Ethelbert Schembri (Facebook)