Newsbook

Free - On Google Play

View
Impjiegi minn jobsinmalta.com  

Azzopardi jallega li l-Bank Ċentrali qed iħallas lill-kredituri ta’ Pilatus Bank; il-Bank iwieġbu

Beppe Galea  -  16/05/18 06:59 PM

Aġġornata 21:25 bir-reazzjoni tal-Bank Ċentrali

Id-deputat Nazzjonalista Jason Azzopardi qal li l-Bank Ċentrali qed iħallas lill-kredituri tal-Bank Pilatus.

Fil-Parlament, Azzopardi staqsa lill-Ministru għall-Finanzi għaliex minn Ħamis ix-Xirka ‘l quddiem, il-Bank Ċentrali ta’ Malta ħareġ il-flus b’direct credit online.

Qal li f’April biss, tħallsu aktar minn €129,000.

Semma wkoll lid-Deputat Gvernatur Sandro Demarco b’ismu għaliex staqsa għalfejn qed jitħalla jipproċessa dawn it-transazzjonijiet waħdu fejn indika wkoll li l-proċedura qed issir b’segretezza.

Azzopardi ta x’jifhem ukoll li l-Uffiċċju tal-Prim Ministru eżerċita xi tip ta’ pressjoni biex dan isir filwaqt li ma ħarġet ebda notifika pubblika.

Casa jikteb lill-Bank Ċentrali Ewropew

Fil-pront kienet ir-reazzjoni tal-Membru Parlamentari Ewropew David Casa fejn qal li bagħat ittra lill-Bank Ċentrali Ewropew b’dak kollu li ġie żvelat fil-Parlament Malti aktar kmieni waranofsinhar.

Casa qal li u bagħtet ittra lill-President tal-Bord ta’ Sorveljanza tal-Bank Ċentrali Ewropew fejn wasslilha l-aħħar rivelazzjonijiet u talabha tinvestiga l-fatti.

L-Ewroparlamentari qal li l-fatt li trasferimenti bħal dawn inżammu sigrieti għal dawn l-aħħar ġimgħat hija biżżejjed biex ikun hemm implikazzjonijiet serji.

Il-Bank Ċentrali ma jiċħadx, jgħid li “kollox legali"

B’risposta għal dan, il-Bank Ċentrali qal li waħda mill-funzjonijiet tiegħu bħala bank ċentrali, tinkludi t-tħaddim ta’ kont ta’ depożitu li Pilatus Bank għandu miegħu. Qal li dawn it-tranżazzjonijiet huma parti mill-miżuri amministrattivi li l-MFSA tagħmel ma’ kull istituzzjoni tal-kreditu.

 Il-Bank Ċentrali ta’ Malta ċaħad bil-qawwa li l-Uffiċju tal-Prim Ministru għamel xi pressjoni fuq il-Bank Ċentrali ta’ Malta dwar xi kwistjoni jew oħra.



Ritratt: Reuters